Saturday, July 12, 2014

HEALTH FRONTIERS: Sambong sa bato?







Salamat sa pagsagot mo sa email ko tungkol sa kidney stone kahapon sa Abante. Gumagamit ako ng sambong capsule para dito. Paano malalaman kung natunaw na ang bato? Kailangan bang magpa-­ultrasound ulit? Mahal kasi eh. -- Veejay.
***

Kadalasan mararamdaman kung lumabas na ang bato habang umiihi. Pero mas sigurado ang ultrasound dahil nakikita talaga kung may natira pa.
Ang Blumea balsamifera o sambong ay ginagamit bilang diuretic o water pill. Nagpapalabas ito ng tubig sa katawan kaya sinasabing lalabas ang bato dito. Pero take note na wala itong “approved therapeutic claims”. Ibig sabihin ay hindi garantisado na lalabas ang bato dito at hindi rin ito kinikilala na gamot sa kidney stone.

Kung ako sa iyo, uminom ka na lang ng mara­ming tubig. Libre lang ito at wala pang side effects.

***

Nagagamot ba ang hepa B? Paano? -- Name withheld.

***

Walang gamot ang hepatitis B pero huwag mag-alala dahil karamihan ng apektado ay gumagaling kahit malubha ang sintomas nila. Ang delikado ay mga bata at sanggol dahil puwede silang magkaroon ng chronic infection na maaaring magdulot ng liver failure o cancer.

Kung na-expose ka sa hepa B virus, pumunta sa doktor agad upang magpa-injection ng hepa B immune globulin. Kapag ginawa ito sa loob ng 24 oras, maaaring hindi ka na magkaroon ng hepa B. Kung acute ang infection, kusa itong mawawala at hindi na kailangang gamutin. Bibigyan ka lamang ng gamot para mawala o mabawasan ang sintomas nito.

Kung may chronic hepa B infection, bibigyan ka ng doktor ng antiviral medicines para labanan ang virus at hindi masira ang atay. Kung sira na ito, kaila­ngan ng liver transplant.

***

May problema ka ba sa kalusugan? Nais mo bang maliwanagan sa sakit mo? Mag-email kay George Nava True II sageorgenavatrue@yahoo.com o mag-text sa 0935-9720691. Sasagutin ni George ang problema mo dito. Si George ay National Press Club at Phi­lippine Dental Association awardee, at author ng 3 health books. Sundan siya sa Twitter sa https://twitter.com/georgenavatrue.