HEALTH FRONTIERS: Home remedies sa almoranas
- Written by George Nava True II
Ano ang gamot sa almoranas? -- Bong Sibog ng Trece Martires, Cavite
Depende ito sa laki. Kayang talunin ang maliit na almoranas sa pamamagitan ng home remedies. Gumamit ng over-the-counter cream, ointment, o suppository na may witch hazel o hydrocortisone para pansamantalang mawala ang sakit at pangangati. Pero huwag lumampas sa isang linggo ang paggamit nito dahil nakaka-irita ang nasabing produkto. Makakatulong din ang mga painkillers tulad ng ibuprofen, aspirin o paracetamol.
Magbabad sa sitz bath o maligamgam na tubig. Ilagay ito sa palanggana at umupo dito ng 10 hanggang 15 minuto dalawa o tatlong beses sa isang araw. Maligo araw-araw at linisin nang mabuti ang puwit. Huwag gumamit ng matapang na sabon o wipes na may pabango. Patuyuin nang mabuti ang pigi pagkatapos maligo.
Huwag gumamit ng tuyong tisyu pagkatapos magdumi. Mas maganda ang wet tissue basta wala itong pabango o alcohol. Pwedeng lagyan ng yelo o cold compress ang puwit para mabawasan ang pamamaga. Kapag hindi nawala ang pagdurugo o pananakit, pumunta sa doktor. Baka kailangang operahan na.
***
Mag-isang linggo nang may kasamang dugo ang dumi ko. Medyo masakit at makati ang puwit ko. -- Name withheld
***
Batay sa sintomas mo, maaaring may almoranas ka. Basahin ang itaas. Pumunta sa doktor para makatiyak.
***
Ano ang gagawin para pumuti ang mukha? Madami na akong ginamit pero walang pa ring epekto. -- Name withheld
***
Epektibo ang mga produkto na may hydroquinone. Pwede itong bilhin kahit walang reseta. Sa mga over-the-counter hydroquinone products, ang mas epektibo ay ang 2% hydroquinone. Kung hindi uubra ito, bibigyan ka ng doktor ng produktong may 4% hydroquinone o mas mataas pa.
Sundin ang utos ng dermatologist sa paggamit nito at huwag ilagay sa mata, ilong o bibig. Maaaring makaranas ng mild burning, stinging, pamumula o pagtuyo ng balat. Kapag tumagal o lumalala ito, tigilan ang paggamit at sabihin sa doktor.
***
May problema ka ba sa kalusugan? Nais mo bang maliwanagan sa sakit mo? Mag-email kay George Nava True II sa georgenavatrue@yahoo.com o mag-text sa 0935-972-0691. Sasagutin ni George ang problema mo dito. Si George ay National Press Club at Philippine Dental Association awardee at author ng 3 health books.
Comments
Post a Comment